నా తెలుగు కవితలు

Posts

నీ కోసం.........

August 23, 2014

ఇక్కడ- ఈ నిరీక్షణ గదిలో నీ కోసమే నేను. నా మనసు మాత్రం నిరంతరం నీ దగ్గరే! ఇక్కడ- కొంటెగాలి అమాయకమైన పువ్వుల్ని అల్లరి పెడుతూంది ఈ పువ్వుల్ని నీ సిగలో దాయాలని ఉంది. ఇక్కడ- తుంటరి చంద్రుడు- వెన్నెల నవ్వుల్ని రువ్వుతున్నాడు ఈ వెన్నెల నీ సున్నిత నగ్నత్వంమీద పరవాలని ఉంది ఇక్కడ- నా పిచ్చి గుండె నీ కోసం ప్రత్యేక రస్తా అయ్యింది. ఇక నువ్వు రావడమే...... నీ పాదపూజకోసం ముద్దుల్ని భద్రపరిచాను. ఆశని బట్వాడా చేసే నీ కనుల కోసం...... నీ కోసం......... ఇక్కడ- ఈ నిరీక్షణ గదిలో... నీ కోసమే... నేను

డీబీ పదాలు - 4

August 21, 2014

ఎదురు చూస్తాయి కళ్ళు గుర్తుంచుకుంటాయి కాళ్ళు అధిగమిస్తాయి ముళ్ళ దారిని సంతోషంతో....సహనంతో..... కొండ శిఖరం నుంచి నువ్వు అందించిన చెయ్యి అందుకోలేక పడిపోతాను సఖీ! కల అని తెలుసుకుని మళ్ళి నిద్రలోకి జారిపోతాను - నీ కోసం! ఆధరాన గులాభీలు వదనాన గులాభీలు శిగపాయలో గులాభీలు. నీవు మొత్తం గులాభీ బాలవయి వాడి ముళ్ళు గుండెలో దించుతావు!

అరవిరిసిన పువ్వు

August 21, 2014

ఇంకా మిగిలిన చీకట్లోంచి పరుగెడుతుంది నా మనసు- వెలుగులు చిందే చైతన్యానికి చైతన్యపు భవితవ్యానికి. వినిపించిందక్కడ ఝుం, ఝూ ప్రభంజనపు ప్రళయ హేల. అది, ఉరకలెత్తుతున్న ఏరు చైతన్యపు హోరు చిరిగిన ఇరుల తెరలనుంచి సామాన్యుడి వదనంలో వెలిగింది కల్మషం లేని నవ్వు అరవిరిసిన పువ్వు.

ఋతువులు

August 21, 2014

కళ్ళలోని నీళ్ళతో వత్సరమంతా మాకు వర్షఋతువే! కష్టం మర్చిపోటానికి తాగిన కాసేపు పుట్టే వెర్రి ఆశే మాకు శరదృతువు! అవసరాలు తీర్చుకుని ఆనక వదిలేస్తే - హేమంతం లోని ఆరిపోయిన భోగిమంటలం మేం! కడుపు కోసం కష్టంతో జీవితమంతా మాకు శిశిరమే! ప్రోద్దంతా కష్టించి ఆ కూలితో గంజైనా తాగితే అదే మాకు వసంతం! పని లేక, తిన తిండి లేక ఎండిపోతున్న మాలో ప్రజ్వరిల్లుతోంది గ్రీష్మం!

డీబీ పదాలు - 3

August 20, 2014

సఖీ! రాత్రంతా నీ చూపుల్లా దూరంనుంచి తొంగి చూసే చుక్కలకికూడా నేనంటే అలుసే తెల్లవారకముందే తప్పుకుంటాయి. దూరంగా కలిసే నింగీ,నేలా మనిద్దరం అంటే - ఆ కలయిక బ్రమంటావ్ సఖీ! నిరంతరం నేల గుండెల్లో నింగి ప్రతిబింబం చూసుకుంటూంది చాలదూ! నా కంటి రెటీనా వెనుక ఆర్ట్ గేలరీ లో... కళ్ళు మూసినా, తెరిచినా కనుపించే బొమ్మలు కలల చివరవరకూ పేర్చుకున్నాను. తీరాచూస్తే........అన్నీ నీ బొమ్మలే! సఖీ! చలిరేపిన ఆకలి కోరుతూంది నీ కౌగిలి ...

పాట మీద పేలిన తూటా!?

August 20, 2014

ఒక డప్పు మోత ఒక కర్ర ఊత బుజంమీద గొంగళి మోత చిందేస్తే- జనం గుండెల్లో పరవళ్ళు తొక్కే పాట ఆ పాట మీద పేలిందోతూటా! ****** నిశ్శబ్ద నిశీధిలో రేపటి సూర్యుడి కోసం విప్లవ గీతాలాలపిస్తున్న వెలుతురు పిట్టల్ని గొంతునులిమి, కాలరాయాలని- పదవుల పాదాలచెంత రాలిన ఎంగిలి మెతుకులు కతికి 'కా....కా....' రావాలు చేస్తున్న కాకులు. ( 'ఖాఖీలు' అని నేను రాయలేదు. మీరు అనుకుంటే మీ ఇష్టం)