గదిలో.......
గదిలో.....
కాలాన్ని ముక్క, ముక్కగా
చప్పరిస్తూ - గడియారం.
రెక్కల పురుగు వెనుక
నక్కి, నక్కి కదుల్తూ - బల్లి.
ఆలోచనలతో అతలాకుతలం
అవుతున్న - మనస్సు.
***
కిటికీ తెరిస్తే -
ప్రియురాలి గాఢ పరిష్వంగనంలా
ఒళ్లంతా చుట్టేస్తూ - చల్లని గాలి
కిటికిలోంచి
కంటి రెటినా వెనక్కి ప్రయాణిస్తూ
అనేకానేక బొమ్మలు.
***
భయం కళ్ళతో
'కుయ్యో' మంటూ గజ్జికుక్క
- ఓ ప్రక్క.
ఒళ్లంతా పూలపరిమళాలతో
ఒయ్యారంగా ఊగే మల్లె, మొల్లలు
- మరోప్రక్క.
నల్లటి మబ్బుల మధ్య
మెరుపు తీవెల హడావుడి
- ఆ పైన
తియ్యని మట్టివాసనల గుభాళిoపుతో
నేల తల్లిని అభిషేకిస్తూ వర్షపు చినుకుల హేల
-ఈ క్రింద.
***
బొమ్మలన్నీ కలల చివరవరకూ పేరుస్తూ
నిద్రని కళ్ళమీద కప్పుతున్న చల్లని గాలి.
ఇప్పుడు-
గదిలో.........
నిద్రలో.......నిశ్శబ్దంగా.......
నేనే!
Comments
Post a Comment